حوزہ نیوز ایجنسی کی رپورٹ کے مطابق، نائجیریا کے شہر کانو میں انقلابِ اسلامی ایران کی سینتالیسویں سالگرہ کے موقع پر ایک بڑی ریلی اور جشن کی تقریب منعقد کی گئی، جس میں عوام کی کثیر تعداد نے شرکت کر کے انقلاب اسلامی سے اپنی وابستگی کا اظہار کیا۔
خبر کے مطابق، انقلابِ اسلامی ایران کی سالگرہ کے موقع پر نائجیریا میں جمہوریۂ اسلامی ایران کے حامیوں اور چاہنے والوں کی بڑی تعداد سڑکوں پر نکلی اور انقلاب کی کامیابی کا دن جوش و خروش سے منایا۔ شرکاء نے ہاتھوں میں ایران کا پرچم اٹھا رکھا تھا اور رہبر انقلابِ اسلامی کی تصاویر اور بینرز بھی لئے ہوئے تھے۔
ریلی کے دوران مظاہرین نے بانیٔ انقلاب اسلامی امام خمینی، رہبرِ انقلاب اسلامی آیت اللہ العظمیٰ سید علی خامنہ ای اور نائجیریا کی اسلامی تحریک کے سربراہ شیخ ابراہیم زکزاکی کی تصاویر بلند کیں۔ شرکاء کی جانب سے “اللہ اکبر”، “امریکہ مردہ باد” اور “اسرائیل مردہ باد” جیسے نعرے بھی لگائے گئے۔
مقامی ذرائع کے مطابق، اس تقریب کا مقصد نہ صرف انقلابِ اسلامی ایران کی کامیابی کو خراجِ تحسین پیش کرنا تھا بلکہ ایران اور نائجیریا کے عوام کے درمیان مذہبی، ثقافتی اور فکری روابط کو بھی اجاگر کرنا تھا۔ مقررین نے اپنے خطابات میں کہا کہ انقلابِ اسلامی ایران نے دنیا بھر کے مظلوم اور مستضعف اقوام کو بیداری کا پیغام دیا اور استکباری قوتوں کے خلاف مزاحمت کی نئی روح پیدا کی۔
شرکاء کا کہنا تھا کہ انقلابِ اسلامی کسی ایک ملک تک محدود نہیں بلکہ یہ تمام آزاد فکر انسانوں اور مسلمانوں کے لیے امید اور خودمختاری کی علامت ہے۔ انہوں نے اس عزم کا بھی اظہار کیا کہ وہ ظلم اور ناانصافی کے خلاف آواز بلند کرتے رہیں گے اور اسلامی بیداری کے پیغام کو آگے بڑھائیں گے۔
یہ تقریب نائجیریا کے عوام کی جانب سے جمہوریۂ اسلامی ایران کے ساتھ یکجہتی کا مظہر قرار دی جا رہی ہے، جس نے ایک بار پھر دونوں اقوام کے درمیان فکری اور نظریاتی قربت کو نمایاں کیا۔
آپ کا تبصرہ